عـــــــــــــــــــــارف!!

عارف .. أنا كل يوم بغنيلك .. يا أنا يا أنا . بس عمرى ما شفتك بتغنيلى بعدها ..



عارف .. كل طقم بلبسه بسألك .. ها .. حلو عليا ؟؟ .. بس عمرك ما رديت عليا ..



عارف .. انا كل كلمة بقراها بيك .. وكل كلمة بكتبها ليك .. بس عمرى ما استقبلت أى رد فعل منك ..



عارف .. كل ما بتتلاقى عيوننا .. ببتسملك .. وأدور وشى بعيد عنك .. من قبل ما اعرف حتى .. ردتلى ابتسامتى ولا لأ ..



عارف .. لما بكون زعلانة .. بشكيلك مر الشكوى .. واسألك وسط دموعى .. يرضيك كده ؟؟ .. وعمر ما وصلتنى اجابة منك ..



عارف ..انا بحلم بيك كتير .. بس حتى الحلم .. مبنكلمش بعض فيه ..



عارف .. أنا بدعيلك معايا .. بين كل أدان واقامة .. وفـى كل سجدة .. دعوة الفطار لما بكون صايمة .. بس عمرى ما سمعت همسك .. بتقول آمين ..



عارف .. لما بفرح بقولك .. شكرا لأنك معايا .. مع انك لا لحظتها .. ولا بمليون لحظة قبلها .. كنت ويايا ..



عارف .. انا معرفش عنك غير اسمك .. وشكلك .. تصدق عمرى ما دققت فى ملامحك ..

مش عارفة ليه .. اشمعنى انت دونا عن الجميع .. اللى اختارته يكون معايا فى كل تفصيلة فى حياتى .. واخترت برضو ..ميكونش فى أى رد فعل ليه .. ولو بمزاج خيالى !! ..



عارف .. فى علاقتنا الخرافية دى .. أنا طول الوقت بديك .. ومباخدش منك ..

أو يمكن ..

أكون استكفيت بانى متحصنة بيك منهم .. ومنك ..



عارف .. انا عمرى ما حاولت اعرفك فى الواقع .. أو اقرب من حقيقتك ..

لأنك اكيد .. عمرك ما هتكون اجمل منك .. فى خيالى