بابكى عليكى بحرقه يابلادى
الناس ف ارضك متشتتين
ماليين الربوع والبيادى
ملايين كل واحد راح ف وادى
اخويا تاه هناك
وانا قلت لا هاعيش فيها بامر القاضى
اخترت اعيشك وعيشت هادى
لحد ما العقل صوته بقى صارخ
ما انا قلبى برضك غاضب ومش راضى
مالك جرالك ايه؟ الظلم فجأه بان واتضح
واللى اتستر بايدين الجانى اتفضح
الظلم فجأه يبان مع انه كان اسمه هدوء وأمان
فجاه كده بقى قلبى غاضب مش راضى
مع انه عاش مظلوم عهود والظلم كان اسمه سلام عادى
الدنيا قامت قومتها اتحولت
ثارت فاكرينها ياغلابه بتضحك والعيشه اتبدّلت
كالعاده فينا المنشكح بيقول خلاص اتعدلت
وفينا برضو اللى بيخوف عمال
يقول هبالى دول دى اتقندلت
حيران قلب الغلابه من بعد الرغيف والسكنه والحريه
مطلب رقيق واضح صريح نضيف القصد والنيه
يطلع على جثثهم جبان
طمعان ف الحكم والوصوليه
ياميت ندامه فى كده خسه وحقاره؟
يادى الخيبه القويه
وطنيه آل ديموقراطيه
حاجه تفطّر قلوب البشر
حاجه تفتت عظيم الحجر
لوفينا قلب صحيح مآمن
ماكانش بيننا اتربى خاين
خدتى ايه يامصر منهم
حضنك الدافى ضاممهم؟
يافرحتى لميتى من كل ناحيه جبان
لاجىء ضربك ف مقتل مارعاش فيكى ذرة حنان
يافرحتى بحضنك الدافى
اه وشعبك الصافى
وبابك المفتوح لكل لون وجنس مخلص موافى
اتغذوا ياما ف خيرك
وخيرك ياحره راح لغيرك
ولاؤهم صار للعدا يحدد مصيرك
وآه ياقسوة جيرانك على ولادك
ياعينى على ابنك طافح الكوته
بيموت هناك بالذل كام موتة
اما انا ما انا برضو ابنك
قاعد مستنى باكملك لعيالى حدوته
يمكن الاقيله مطرح
يمكن الزرعه تطرح
يمكن الاقى لابنى حاجه ياكلها يفرح
يمكن ويمكن
الحلم كتر خيره لسه ماطالوش الغلا
الحق احلملى كام حزمه اعينهم للبلا
حالم باعيش ف الخبال والواقع صار اشاعه
يتلاعبوا بيه البياعين والمغرضين ف الاذاعه
وانا مالى بالاذاعه والبياعه
انا راجل طبعى هادى مواطن مصرى عادى
باعيش على قوت يكفى يومى ويوم ولادى
مش فاضى لا اعتصم ولا حتى اطالب و انادى
ماليش رصيد ولا اشتراك ف نادى
انا اصلى لا مؤاخذه مواطن مصرى عادى
طبعى كان سلمى وهادى كان
لازم يعنى اثور علشان اخد مرادى؟
انا ثورت وبرضو هافضل مواطن مصرى عادى
0 التعليقات:
إرسال تعليق